Situata e tensionuar në Lindjen e Mesme ka lënë pasoja të shumta edhe në futboll. Trajneri italian Roberto Mancini është larguar përkohësisht nga drejtimi i klubit nga Katari, Al Sadd, pas një marrëveshjeje të arritur mes tij dhe drejtuesve të klubit.
Lajmi u bë publik përmes një deklarate të përbashkët të shpërndarë në rrjetet sociale. Sipas komunikatës zyrtare, 61-vjeçari vendosi të largohet nga skuadra pas ndeshjes së parë në Champions League për shkak të një problemi shëndetësor në familje.
“Bazuar në marrëveshjen mes trajnerit Roberto Mancini dhe drejtuesve të klubit, u vendos që ai të largohej përkohësisht nga ekipi për arsye familjare mjekësore”, thuhet në deklaratë.
Klubi shtoi se trajneri ishte larguar sipas planit, por zhvillimet e fundit në rajon dhe kufizimet e fluturimeve kanë bërë që ai të mos ketë mundur ende të rikthehet. Megjithatë, drejtuesit e Al Sadd theksojnë se kjo nuk është një ndarje përfundimtare dhe se po punohet për rikthimin e tij në momentin e parë të mundshëm.
Skuadra aktualisht kryeson kampionatin pas 17 ndeshjesh, ndërsa situata e Mancinit ka nxitur edhe spekulime në Itali. Emri i tij është lidhur së fundmi me një rikthim të mundshëm te Sampdoria, klub që po kalon një sezon të vështirë dhe ndodhet sërish në zonën e rënies nga kategoria në Serie B.
Në rrjetet sociale, shumë tifozë të ekipit nga Liguria kanë kërkuar rikthimin e trajnerit italian për të ndihmuar skuadrën në këtë moment delikat. Mancini, i cili fitoi Kampionatin Evropian si trajner i Italisë në vitin 2021, mori drejtimin e klubit të Al Sadd nëntorin e kaluar.
Momentalisht, fluturimet komerciale janë ndaluar ose kufizuar shumë në rajon pas sulmeve të SHBA-ve dhe Izraelit ndaj Iranit dhe sulmeve hakmarrëse ndaj Izraelit dhe shteteve të Gjirit. Nga kjo situatë, ngjarjet sportive të planifikuara në rajon janë shtyrë, përfshirë edhe ndeshjet e Ligës së Kampionëve për zonën aziatike.
