Një ish-kapiten i nëndetëseve ruse, i cili punonte si oficer mobilizimi, është qëlluar për vdekje teksa vraponte në qytetin jugor të Rusisë, Krasnodar, sipas mediave locale, shkruan BBC.
Stanislav Rzhitsky, 42 vjeç, u qëllua për vdekje nga një person i armatosur i paidentifikuar, njoftoi agjencia shtetërore ruse Rossiya 1.
Disa media ruse spekuluan se ai mund të ishte gjurmuar përmes profilit të tij në aplikacionin e fitnesit Strava.
Autoritetet ruse kanë nisur një hetim për vrasjen.
Komiteti Hetimor i vendit – ekuivalenti i FBI-së së SHBA-së – tha se një hetim për vrasje është nisur dhe se zyrtarët do të kërkojnë “të përcaktojnë të gjitha rrethanat e incidentit, si dhe personin që kreu krimin dhe motivet e tij”.
Ish-oficeri i marinës u qëllua në shpinë dhe në gjoks nga një person i armatosur i paidentifikuar ndërsa ai po bënte vrapimin e tij në mëngjes në një park pranë qendrës sportive Olimp, raportoi gazeta e përditshme ruse Kommersant.
Baza, një kanal rus Telegram me lidhje të ngushta me policinë, raportoi se vrasësi mund të kishte gjurmuar vrapimet e Rzhitskit në Strava pasi ai ndoqi rregullisht të njëjtën rrugë ndërsa vraponte.
Një analizë e BBC Verify e profilit të kapiten Rzhitsky – i cili është publik – tregon se ai vraponte shpesh nëpër zonën ku raportohet se është vrarë. Analiza e fytyrës e kryer nga BBC konfirmoi se profili i përkiste Rzhitskit.
Adresa e tij dhe të dhënat personale ishin ngarkuar gjithashtu në uebsajtin ukrainas Myrotvorets (Paqebërësi), një bazë të dhënash e madhe jozyrtare e njerëzve që konsiderohen si armiq të Ukrainës.
Fjala “Likuiduar”, me germa të kuqe, tashmë është mbivendosur në fotografinë e tij në faqe.
Në një deklaratë, inteligjenca ushtarake e Ukrainës tha se parku ishte i shkretë për shkak të shiut të dendur, “kështu që nuk ka dëshmitarë që mund të japin detaje ose të identifikojnë sulmuesin”.
Anton Gerashchenko, një këshilltar i ministrisë së brendshme të Ukrainës, shkroi në Twitter se mediat ruse po akuzonin Ukrainën për përfshirje, por ai nuk tha nëse ky dyshim ishte i justifikuar.
“Deri më tani policia ruse nuk mund të gjejë një kamerë të vetme vëzhgimi që do të tregonte kryerjen e krimit. Kërkimi vazhdon,” tha ai.
Ora dhe kufjet e Rzhitskit u gjetën në vendngjarje, duke treguar se grabitja nuk ishte motivi, sipas gazetës ruse Mash.
Ai thuhet se komandonte nëndetësen Krasnodar, të quajtur sipas qytetit, në Marinën Ruse.
Mediat ukrainase kanë thënë se ai mund të kishte qenë në komandë të anijes kur ajo kreu një sulm me raketa në qytetin ukrainas të Vinnytsia në korrik 2022, i cili vrau 23 njerëz, duke përfshirë tre fëmijë.
Qeveria ukrainase tha se sulmi erdhi nga raketat e lundrimit Kalibr të lëshuara nga një nëndetëse në Detin e Zi.
Por Baza ka cituar babain e Rzhitskit të thoshte se djali i tij dha dorëheqjen nga forcat e armatosura ruse në dhjetor 2021 – përpara pushtimit të plotë të Ukrainës nga Rusia.
Më pas ai u bë zëvendës oficer mobilizimi në rajonin e Krasnodarit./ BBC
