E jashtëzakonshme. Spektakolare. Një kampione e vërtetë. Epitetet për Luiza Gegën nuk janë të mjaftueshme. Kampionia shqiptare e atletikës triumfoi edhe në garën e 3 000 metrave me pengesa në Kampionatin Europian Ekipor 2023, që po zhvillohet në Poloni.
Luiza kaloi e para në finish, me kohën 9:17.31, duke vendosur edhe një rekord të aktivitetit.
Gjithashtu, Gega barazoi rekordin e bullgares Ivet Lalova-Collio, si atletja më e suksesshme e Evropianit Ekipor, me 11 gara të fituara dhe 2 vende të dyta.
Pas suksesit në distancën e 5 000 metrave, me triumfin në 3 000 metra me pengesa, Luiza Gega i dhuroi ekipit shqiptar edhe 15 pikë të tjera në renditje.
