Ministri gjerman i Punëve të Jashtme u kërkoi sot vendeve të Bashkimit Europian që të marrin në ngarkim migrantët për shkak të katastrofës humanitare të shkaktuar nga zjarri në kampin e Morias, në ishullin grek të Lesbosit.
“Ne duhet të përcaktojmë sa më shpejt se si ne mund të mbështesim Greqinë dhe përmes këtyre ndihmave bën pjesë një rishpërndarje mes vendeve të BE-së, të gatshme për të mirëpritur migrantët”, konfirmoi në Twitter, Heiko Maas, vendi i të cilit siguron presidencën e radhës së Bashkimit Europian, pas zjarrit që shkatërroi kampin ku strehoheshin më shumë se 12 000 migrantë.
Komisioni Europian njoftoi sot se do të merrte në ngarkim transferimin e menjëhershëm drejt Greqisë kontinentale të 400 fëmijëve që ndodheshin në kampin e refugjatëve të Morias, në Lesbos, i cili u përfshi nga një zjarr i madh.
Sipas agjencisë greke të lajmeve ANA, zjarret shpërthyen pas revoltës së disa azilkërkuesve, të cilët do të vendoseshin në izolim, pasi kishin rezultuar pozitiv për koronavirusin.