Presidenti francez, Emmanuel Macron vlerësoi sot në mbrëmje se zjarret në Amazonë përbëjnë një krizë ndërkombëtare dhe i kërkon anëtarëve të G7-ës që të bisedojnë për këtë urgjencë gjatë samitit në Biarric (jugperëndim të Francës) këtë fundjavë.
“Shtëpia jonë po digjet. Në kuptimin e drejtë të fjalës. Amazona, mushkëria e planetit tonë që prodhon 20% të oksigjenit, është në zjarr. Kjo është një krizë ndërkombëtare. Anëtarë të G7-ës, të mblidhemi për dy ditë që të flasim për këtë urgjencë”, shkruan presidenti francez në “Twitter”, duke iu referuar frazës së shprehur në vitin 2002 nga paraardhësi i tij Jacques Chirac, “shtëpia jonë digjet dhe ne shohim gjetkë”.
