Kampionia Olimpike, Majlinda Kelmendi, do të rikthehet të premten në gara, pas pushimit që bëri në Grand Slamin e Parisit, pasi do të garojë në Grand Slamin e Dyseldorfit, që mbahet prej të premtes deri të dielën.
Majlinda, e cila do të garojë të premten në kategorinë e saj deri në 52 kilogramë, është garuesja e vetme që do të përfaqësojë vendin tonë, pasi xhudistët tjerë, Akil e Nora Gjakova, Distria Krasniqi dhe Loriana Kuka, do të pushojnë.
Grand Slami i Dyseldorfit është gara e dytë këtë vit për medalisten e artë Olimpike, pas medaljes së artë të fituar muajin e kaluar në Grand Prixin e Tel Avivit.
Kampionia olimpike e kishte mposhtur në finale me ippon izraeliten Gili Cohen për ta fituar medaljen e parë për vitin e ri. Ajo ishte e mrekullueshme përgjatë katër ndeshjeve që i zhvilloi në këtë garë, duke i fituar të gjitha me ippon.
Këtë formë të mirë, xhudistja pejane do të tentojë ta shfaqë edhe këtë fundjavë, pasi që do të garojë në Grand Slamin e Dyseldorfit, ku marrin pjesë 683 garues nga 97 shtete. Grand Slami është i vlefshëm për pikë Olimpike Tokio 2020.
“Dyseldorfi është një ndalesë vendimtare në rrugën drejt Lojërave Olimpike Tokio 2020 dhe kampionatit botëror të xhudos që mbahet në Tokio këtë vit. Kampionët Olimpikë dhe të botës do të garojnë në Gjermani, ku tifozët e xhudos mund të presin një garë spektakolare”, ka deklaruar presidenti i Federatës Ndërkombëtare të Xhudos, Marius Vizer.
