Të shtunën u shënua një ngjarje e rëndë në fshatin Qesarakë të Maliqit, që rezultoi me të paktën një viktimë dhe dy të plagosur.
Ramiz Muçollari, 62 vjeç, mbeti i vrarë, pasi refuzoi të dorëzohet dhe shkëmbeu zjarr me policinë lokale dhe forcat RENEA.
Pak orë më herët ai plagosi me thikë bashkëshorten 58 vjeçe dhe djalin e tij 27 vjeç.
Të dy familjarët ndodhen aktualisht në spitalin e Korçës, nën kujdesin e mjekëve.
Policia shkoi në vendngjarje, ku konstatoi të mbyllur në banesën e tij autorin e dyshuar, të armatosur me një mitraloz të lehtë dhe i gatshëm të qëllojë drejt oficerëve.
Pas mbërritjes së Forcave Speciale “RENEA”, u rrethua perimetri i banesës dhe u negociua për dorëzimin e Muçollarit, i cili vijoi të qëllojë pa pranuar thirrjet e vazhdueshme.
Forcat “RENEA” mundën të hyjnë deri në katin e dytë të banesës, ku sërish u ndeshën me të shtënat e 62-vjeçarit.
Muçollari raportohet se vuante nga probleme të shëndetit mendor dhe një ditë më parë duhej të ishte shtruar në spital.
