Politikani dhe juristi Ylli Manjani në fjalimin e mbajtur në protestën para kryeministrisë kundër Open Balkan pati një mesazh të qartë për presidentin serb Aleksandër Vuçiç i cili ndodhet për një vizitë dy ditore në vendn tonë.
Manjani: Kam një fjalë të shkurtër dhe të thjeshtë me mysafirin. Nëqoftëse nuk njohin Kosovën nuk njohin as Shqipërinë. Unë nuk jam diplomat, nuk kam as patriotizma për të shitur. Kush nuk e njeh Kosovën, nuk e njeh Shqipërinë, nuk e respekton Shqipërinë. Prandaj zotëri, nëqoftëse do të jesh mik me shqiptarët njih Kosovën. Ky është kushti, nuk ka tjetër. Njihe Kosovën dhe je miku jonë, përndryshe nëse nuk njeh Kosovën ne të respektojmë si mysafir, të bëftë mirë peshku dhe rrugë të mbarë nesër.Ne nuk jemi mbledhur për t’ju përmendur bukën mysafirëve, nuk e kemi traditë. Por e kemi me të zotin e shtëpisë i cili nuk ka autorizimin tonë për të na përfaqësuar në çështje të tilla.
Me tone kritike ai u shpreh për qëndrimin e kryeministrit Rama.
Manjani: A mund të na e shpjegojë dikush çfarë është Ballkani i Hapur. Çfarë Ballkani u hapka kur mbyllet dera e Shqipërisë? Ne kemi nevojë të hapet dera e Shqipërisë, jo për emigrantë, por për njerëz me dinjitet. Nuk mund të ecim më as me tru peshku dhe as tru gomerësh. Duhet ti bëjmë ballë Shqipërisë. Ne nuk mund të detyrojmë mysafirin ndoshta të njohë Kosovën por kemi detyrimin të jemi në krah të Kosovës dhe nuk mund të ulemi në asnjë tryezë në krah me serbët dhe përballë me Kosovën. Përkundrazi, ne duhet të jemi në çdo tryezë krah Kosovës, janë vëllezërit tanë. Nuk mund të shkojmë në takime me armikun e vëllait, ai që nuk na respekton vëllain nuk është as miku jonë. Ne jemi një.
