5 viktima të reja nga koronavirusi në vend. Dje në Klinikën e sëmundjeve infektive kanë vdekur dy pacientë- një grua 71 vjeçe nga Llabunishta e Strugës dhe një burrë nga Kumanova 77 vjeç.
Ata janë hospitalizuar në gjendje të rëndë shëndetësore. Tre të vdekurit e tjerë kishin ndërruar jetë disa ditë më parë por rezultatet nga testimet kanë dalë sot. Bëhet fjalë për një qytetar nga Velesi, një qytetarë i huaj i cili në Shkup ka jetuar katër muaj dhe kumanovari i cili para dy ditësh vdiq në Klinikën infektive. Në vend tani ka 17 viktima nga Korona virusi. Zëvendësministri i shëndetësisë Armend Asllani për Alsat sqaron se të vdekurit kanë pasur edhe sëmundje të tjera.
Në 24 orët e fundit në vend janë regjistruar edhe 53 raste të reja të infektimit me Korona virus. Më së shumti në Strugë 14, pastaj Shkup 13, Kumanovë 8, Koçanë 6, Shtip 5, Tetovë dhe Gostivar nga 2 dhe një rast në Veles. Me këtë, numri i përgjithshëm i të prekurve me Korona virus në vend arrin 483. Nga të infektuarit e ri nga Struga, nëntë janë nga Llabunishta, dy nga Veleshta dhe një nga qyteti. Arsllani, duke komentuar se Llabunishta mund të bëhet vatër e re e virusit, thotë se atje sërish është mbledhur shtabi i krizave dhe se situata po ndiqet me vëmendje.
Në 24 orët e fundit janë testuar 414 qytetarë me çka gjithsej janë testuar thuajse 5 mijë qytetarë. Mes tyre ka edhe punonjës shëndetësor që janë pozitiv me Korona virus. Është mbyllur Qendra e shëndetit publik në Gostivar pasi është vërtetuar se njëri nga të punësuarit është pozitiv me Korona virus. Në Kumanovë janë infektuar dhjetëra persona nga personeli mjekësor, ndërsa në repartin infektiv në Shtip 14 punonjës mjekësor janë dërguar në izolim. Prej tyre, dy infektologë, 8 motra medicinale dhe 4 infermierë. Ata kanë pasur kontakt me pacienten 80 vjeçe që ka qenë pozitive me Korona virus. Në poliklinikën e Çairit një e punësuar është pozitive me virusin edhe pse nuk ka pasur kontakt me pacientët. Spitali është dezinfektuar, ndërsa pika e testimit punon pa pengesa. Për këtë shtabi kryesor koordinues për parandalimin e Kovid 19, punonjësve shëndetësor u rekomandon maksimalisht të mbrohen dhe t’u përmbahen protokolleve për punë. Në të kundërtën, inspektorati shtetëror sanitarë dhe shëndetësor do t’i sanksionojë.
53 të infektuar të ri me korona virus:
Strugë – 14 Shkup – 13
Kumanovë – 8 Koçanë – 6
Shtip – 5 Tetovë – 2
Gostivar – 2 Veles – 1./Alsat/
