Vazhdojnë ende spekulimet rreth rastit të incidentit që i ndodhi Christian Eriksenit me Danimarkën, në ndeshjen e parë kundër Finlandës në “Euro 2020”.
Erikseni në fund të pjesës së parë ra pa ndjenja në fushë dhe ende nuk dihet shkaktari pse erdhi deri te ajo situatë. Mesfushori i Interit tani është në gjendje të mirë dhe stabile, por ende është në një spital në Kopenhagë.
Mjekët janë duke kërkuar përgjigjen që e çoi atë deri në kolaps, ndërsa ka pasur shumë spekulime. Ato thonë se Erikseni nuk ka qenë në gjendje të mirë në muajt e fundit shkaku i koronavirusit dhe se ai është vaksinuar para nisjes së Kampionatit Evropian. Dhe sipas spekulimeve, kjo ka qenë arsyeja e kolapsimit të Eriksenit. Një gjë të tillë e ka mohuar kategorikisht drejtori sportiv i Interit, Beppe Marota. Marotta tha se këto lajme nuk bën të tolerohen.
“Christiani nuk ka qenë i sëmurë me koronavirus dhe po ashtu nuk është vaksinuar”, ka thënë Marotta, që është në kontakt të vazhdueshëm me mjekët danez.
