Sekretari i Përgjithshëm i OKB-së, Antonio Guterres ka përshëndetur marrëveshjen për armëpushim dhe lirimin e pengjeve në Gaza duke e cilësuar si një hap drejt vetëvendosjes së popullit palestinez.
“I nxis të gjithë të shfrytëzojnë këtë mundësi historike për të krijuar një rrugë të besueshme politike përpara. Një rrugë drejt përfundimit të okupimit, njohjes së të drejtës për vetëvendosje të popullit palestinez dhe arritjes së një zgjidhjeje me dy shtete”, tha Guterres në OKB.
Shefi i OKB-së kërkoi qasje të plotë dhe të qëndrueshme për punonjësit humanitarë në Gazë, ku ka një krizë humanitare pas fushatës ushtarake izraelite që pasoi sulmin e udhëhequr nga Hamasi më 7 tetor 2023.
“OKB-ja është gati të ofrojë mbështetjen e saj të plotë. Ne dhe partnerët tanë jemi të përgatitur të veprojmë – tani”, u shpreh Guterres ndërsa shtoi se “kemi ekspertizën, rrjetet e shpërndarjes dhe marrëdhëniet me komunitetin për të vepruar. Furnizimet janë gati dhe ekipet tona janë në pritje.”
Guterres vlerësoi rolin e Shteteve të Bashkuara, Katarit, Egjiptit dhe Turqisë për këtë “përparim të domosdoshëm” dhe bëri thirrje për një armëpushim të përhershëm.