“Rithemelimi” i Berishës tërhiqet nga protestat që kishte ideuar për të zhvilluar kundër marrëveshjes për migrantët të firmosur mes dy kryeministrave të Italisë dhe Shqipërisë, Meloni- Rama.
Lajmi është bërë i ditur të enjten nga kreu i këtij grupimi, Sali Berisha, i cili konfirmoi se kishte marrë një telefonatë me tone shumë të ashpra nga numri 2 i qeverisë italiane, njëkohësisht edhe ministër i Jashtëm i Italisë, Antonio Tajani.
Telefonata duket se ka marr shkas edhe nga një protestë që “Rithemelimi” i Berishës bëri në Lezhë, qarkun ku është ideuar ngritja e dy kampeve në Shëngjin dhe Gjadër.
Nga ana tjetër, krerë të këtij grupimi, në mënyrë të vazhdueshme, qoftë në parlament ashtu edhe në selinë qendrore, janë deklaruar zyrtarisht se do të organizojnë protesta, në lidhje me marrëveshjen mes dy qeverive, asaj italiane dhe shqiptare, për marrëveshjen e migracionet për shtetasit nga vendet e Afrikës Qëndrore.
Por Berisha duket se ka bërë një hap pas në këtë drejtim, pasi zyrtarët më të lartë të së djathtës italiane në qeveri, kanë folur “ashpër” dhe “pa dorashka” me të, gjë të cilën ai e pohoi edhe vetë kur u shpreh para mediave se numri dy i qeverisë italiane ishte “i ashpër”.
“Disa orë pasi jam shprehur para mediave, më ka marrë në telefon zv/kryeministri i Italisë, Antonio Tajani, të cilin e njoh prej 30 vitesh dhe është i Forza Italia. Më thotë: Sali, e pamë deklaratën e PD-së, ne e kemi atë e këtë problem. Ishte i ashpër.”, konfirmoi Berisha, por pa dhënë të tjera detaje, të cilat duket se janë më shumë se deklarimet e kreut të “Rithemelimit”.
Berisha deklaroi se i ka thënë shefit të diplomacisë italiane, Tajani se “PD nuk mund të organizojë protesta dhe të nxisë ksenofobinë”.
“Nuk mund të nxisë protesta kundër Italisë, por gjykoj se Italia, si njeri që kam qenë president dhe kryeministër i këtij vendi, i ka dhënë një ndihmë të jashtëzakonshme Shqipërisë. Ndihma italiane është shumë interesante, pasi krahas miliardave, që janë njëra anë, janë shumë më tepër lidhur me ata që kanë mësuar shqiptarët. Ka qenë në një farë mënyrë një lloj universiteti edhe në kuptimin e punësimit, financimit, por edhe shkollimit. Sot në universitetet italiane janë mbi 30 mijë shqiptarë, ka mbi 20 mijë biznesmenë të mesëm dhe të fuqishëm shqiptarë, të cilët, në një mënyrë apo tjetër, investojnë në Shqipëri. Në konceptin tim nuk protestohet kundër vendeve të lira, sidomos në një vend që ka përjetuar diktaturën. Nuk është shumë normale që të protestojmë. Nuk mund të krahasojmë kurrë një vend të lirë me Serbinë, p.sh.”, tha Berisha.
