Propozimi i fundit i hartuar nga i dërguari special i SHBA-së, Steve Witkoff, për një marrëveshje për lirimin e pengjeve ka pak gjasa të ketë sukses.
Kështu shkruajnë mediat izraelite të cilat i referohen një burimi arab, ku sipas tij, propozimi parashikon që Hamasi të lirojë të gjithë pengjet e mbetur brenda 48 orëve të para, në këmbim të një garancie nga SHBA-ja se Izraeli nuk do të rifillojë luftën, si dhe lirimin e disa mijëra të burgosurve palestinezë të ndaluar në Izrael.
Megjithatë, Hamasi ka shprehur kundërshtime ndaj idesë së lirimit të menjëhershëm të të gjithë pengjeve pa garanci konkrete se Izraeli nuk do të mund të rifillojë luftën.
Burimi arab theksoi se Hamasi nuk i konsideron të mjaftueshme garancitë e SHBA-së, duke përmendur mbështetjen e administratës Trump për vendimin e Izraelit për të rifilluar luftën në mars, në vend që të kalonte në fazën e dytë të një marrëveshjeje për armëpushim dhe lirimin e pengjeve, e cila kishte qenë në fuqi që nga janari.
Ndërsa presidenti i SHBA-së, Donald Trump, deklaroi dje se Izraeli ka pranuar kushtet e tij për një marrëveshje që i jep fund luftës, kryeministri izraelit Benjamin Netanyahu ende nuk ka mbajtur një mbledhje kabineti për të diskutuar shkëmbimin.
Propozimi mund të hasë në kundërshtime nga partnerët e koalicionit të krahut të djathtë të Netanyahut, për shkak të kërkesës për tërheqjen e Forcave të Mbrojtjes së Izraelit (IDF) nga Gaza, ku shumë prej tyre synojnë të rivendosin vendbanime izraelite.
