Pas ndeshjeve të para në turin e tretë të Champions League, gjithçka mbetet ende e hapur. Marseille humbi në mënyrë surprizë në fushën e Panathinaikos, me rezultatin 1-0.
Francezët vuajtën faktin që luajtën në inferioritet numerik, pas kartonit të kuq të minutës së 65-të, të blerjes më të re të skuadrës, Kondogbia. Marseille kapitulloi 7 minuta përpara fundit të lojës, me Bernard që i dha avantazhin grekëve.
Fitore regjistruan Maccabi Haifa e Rangers. Izraelitët hipotekuan fazën play-off pas fitores 2-1 në fushën e Slovan Bratislava. Pierrot dhe Saba shënuan golat e triumfit në 15 minutat e para të lojës, teksa autogoli i Seck në mes i lë ende shpresa sllovakëve të besojnë te përmbysja e madhe.
Me rezultatin 2-1 fituan edhe Rangers, që thyen Servette. Edhe skuadra nga Glasgou shënoi dy herë në 15 minutat e para të sfidës, me penalltinë e Tavernier dhe Dessers.
Zviceranët nuk u dorëzuan, duke shkurtuar diferencën në fundin e pjesës së parë me Bedia dhe do të provojnë të bëjnë surprizën e madhe në ndeshjen e kthimit në shtëpi.
