Persona të armatosur vranë 19 vetë të dielën në një zonë ku zhvilloheshin dyluftime të paligjshme me gjela në Meksikën perëndimore. Masakra ndodhi në Las Tinajas në Miçoakan (Michoacan), brenda territorit të kartelit të fuqishëm dhe famëkeq të drogës Jaslisco Nueva Generacion.
Autoritetet thanë se viktimat ishin 16 burra dhe 3 gra. Prokuroria ka nisur hetimet, por nuk ka ende një ide të qartë se kush janë autorët e ngjarjes tragjike. Të gjitha viktimat kishin plagë të shkaktuara nga armë zjarri, ndërsa disa të tjerë, të plagosur, u dërguan në spital.
Miçoakan është prej kohësh një prej territoreve meksikane më të rrezikshme, ku ligji nuk ekziston më. Muajin e kaluar, autoritetet amerikane pezulluan importimin e avokadove prej andej, pasi disa inspektorë amerikanë ishin kërcënuar. Më pas, pezullimi i shfuqizua.
Dhuna e shkaktuar nga bandat e armatosura dhe kartelet e drogës ka rritur në nivele rekord shifrat e vrasjeve. Situata bie ndesh me premtimin e bërë nga Presidenti Andres Manuel Lopez Obrador në vitin 2018, kur nisi mandatin, se do të sillte paqen në vend, duke ndjekur një qasje më pak konfliktuale me organizatat kriminale. Por situata nuk është përmirësuar aspak dhe numri i vdekjeve nga viti në vit sa vjen e shtohet.
