Kryeministrja britanike, Theresa May u kërkoi sot deputetëve që të mbështesin planin e saj për të nxjerrë Britaninë e Madhe nga Bashkimi Evropian, në një seri votimesh që do të zhvillohen deri më 29 mars.
Zëvendësi i May, David Lidington, hapi një debat parlamentar me një kërkesë ndaj deputetëve në dhomën kryesore, atë të Komuneve, që të mbështesin lëvizjen e saj në procesin e Brexit, shkruan ATSH.
Nga ana tjetër laburistët kanë kërkuar që Britania e Madhe të qëndrojë në një union doganor të përhershëm dhe të pranueshëm me BE-në pas Brexit si dhe të ketë lidhje të ngushta me tregun unik evropian. Lideri i laburistëve, Jeremy Corbyn tha se ai do të mbështesë një referendum të dytë mbi Brexit nëse, ashtu siç pritet, propozimi i partisë së tij humbet në Parlament.
