Kryeministrja e Britanisë së Madhe, Theresa May, ka thënë se ka qenë e detyruar të ulet në tavolinën e bisedimeve me laburistët në përpjekje për të arritur marrëveshje për Brexitin.
Përmes një deklarate të publikuar në orët e vona të së shtunës, May tha se ekziston një zgjedhje e qartë mes largimit nga Bashkimi Evropian me marrëveshje dhe qëndrimit në BE.
Disa deputetë konservatorë e kanë kritikuar atë për shkak se kërkoi ndihmnë nga partia opozitare pas dështimit të marrëveshjes në kuvend për tri herë me radhë.
Pavarësisht përpjekjeve, tri ditë të bisedimeve mes qeverisë dhe laburistëve nuk kanë dhënë ndonjë rezultat.
Kryetari i Partisë Laburiste, e cila është partia më e madhe opozitare, tha se është duke pritur që të lëvizen vijat e kuqe dhe se deri tash nuk ka vërejtur ndonjë ndryshim të madh në qëndrimin e qeverisë.
Ai ndodhet nën presionin e deputetëve të partisë së tij për shkak të kërkesës për referendum në çfarëdo lloji të marrëveshjes që arrihet me qeverinë. 80 deputetë laburistë kanë kërkuar zyrtarisht që referendumi të jetë kërkesa kryesore në negociatat me kryeministren britanike.
Deputetët britanikë ende nuk e kanë miratuar marrëveshjen për largimin e vendit nga BE-ja, ndonëse afati i fundit për ta bërë një gjë të tillë është data 12 prill, shkruan “BBC”.
