Një zëdhëns i qeverisë britanike ka dhënë shenjë se kryeministrja May nuk e ka ndër mend ta publikojë datën e dorëheqjes, duke thënë se ajo është e vendosur që ta çojë deri në fund procesin e tërheqjes së vendit nga Bashkimi Evropian.
Zëdhënësi i refuzoi thirrjet e disa konservatorëve për dorëheqje të kryeministres pasi tha që ajo tashmë e ka bërë një ofertë mjaft të mirë për dorëheqje nëse miratohet në kuvend marrëveshja e saj për Brexitin.
“Ajo është këtu për ta kryer fazën e parë të Brexitit dhe më pas do të largohet për të hapur rrugë për udhëheqësinë e re dhe fazën e dytë. Kjo është data për të cilën ajo po punon: ajo dëshiron që ta përfundojë Brexitin”, tha zëdhënësi.
Refuzimi i kryeministres për të dhënë dorëheqje vjen para takimit jetik të Komitetit të Konservatorëve, ku do të vendoset nëse do të ndryshohen rregullat e partisë për mbajtjen e një votimi tjetër për mocion mosbesimi ndaj udhëheqëses së tyre.
Sipas rregullave aktuale, kryeministrja May nuk mund të përballet me mocion mosbesimi më shpesh sesa një herë në vit, ndërsa ajo e kishte kapërcyer me sukses mocionin e dhjetorit të vitit të kaluar, shkruan “The Guardian”.
