Në qytetin Derby, në Angli, është hapur një ekspozitë e veçantë e quajtur “The Greatest Gathering”, që konsiderohet si pika e grumbullimit më e madhe në botë e trenave. Eventi po zhvillohet në fabrikën historike të Alstom në Litchurch Lane dhe do të zgjasë deri më 3 gusht 2025.
Vetëm 40 mijë persona arritën të sigurojnë bileta, ndërsa të ardhurat e këtij aktiviteti sipas një artikulli të La Repubblica do të shkojnë për bamirësi.
Panairi përkon me 200-vjetorin e trenit të parë të pasagjerëve me avull në botë, i ndërtuar nga George Stephenson dhe i njohur si Lokomotiva Numër 1. Ky tren ndodhet sot në ekspozitë, përkrah shumë trenave modernë, si Alstom Class 720 Aventra, si dhe trenave të famshëm si Flying Scotsman dhe Pendolino, treni italian me sistem të avancuar për të përballuar kthesat me shpejtësi të lartë.
Fabrika e Alstom në Derby është e vetmja në Britani që projekton, ndërton dhe teston trena për tregun vendas dhe ndërkombëtar. Ka ndërtuar trena pa ndërprerje që nga viti 1839.
Ekspozita përfshin më shumë se 140 mjete hekurudhore, si:
-Lokomotiva me avull më e vjetër në përdorim, Furness Railway Nr. 20,
-Legjendarja Flying Scotsman, e para që arriti 100 milje/orë,
-Treni mbretëror i përdorur nga Mbretëresha Elizabeta II dhe aktualisht nga Mbreti Charles.
Vizitorët mund të udhëtojnë me trena të ndryshëm, në një pistë prove 1.4 km, me lokomotiva me avull, naftë dhe elektrike. Ndër to është edhe Prince, lokomotiva me shina të ngushta më e vjetër në botë ende në përdorim.
Ndërkohë, në Britani ka debate për gjendjen e hekurudhave. Qeveria e re laburiste po rikthen në pronësi publike të gjitha linjat hekurudhore. Gjithashtu, projekti HS2, linja e re e shpejtësisë së lartë nga Londra në veri të Anglisë, është kritikuar si një dështim, për shkak të kostove që janë rritur nga 37 në 100 miliardë paund dhe për shkak të vonesave.
Sipas Alstom, sfidat përfshijnë edhe mungesën e profesionistëve në këtë sektor. Kompania synon që në 10 vitet e ardhshme të zhvillojë trena autonomë, me më shumë kapacitet, efikasitet dhe ndërlidhje, jo vetëm më shumë shpejtësi.
