Sulmuesi i Francës, Kylian Mbappe mund të mbetet te Paris Saint-Germaini edhe pas përfundimit të sezonit aktual.
Këtë e ka bërë të ditur e ëma e tij, që ka shtuar se negociatat për rinovimin e kontratës me PSG-në po shkojnë shumë mirë përkundër interesimit të Real Madridit për të birin e saj.
Mbappe ishte pranë largimit nga PSG-ja gjatë afatit kalimtar të verës, por ekipi francez refuzoi të gjitha ofertat për sulmuesin.
Madje, Mbappe ditë më parë tha se e kishte njoftuar PSG-në se dëshironte të largohej por që kërkesa e tij nuk u mor parasysh.
“Aktualisht, jemi në negociata me PSG-në për rinovimin e kontratës dhe gjërat po shkojnë shumë mirë. Madje, kam pasur edhe një takim me drejtorin e klubit, Leonardon”, ka thënë Fayza Lamari, e ëma e Mbappes që përfaqëson të birin e saj.
