Kreu i Grupit Parlamentar të Partisë Demokratike, Gazment Bardhi ka bërë me dije se në mbledhjen e zhvilluar këtë të hënë (17 korrik) u mor vendimi për të kërkuar interpelancë me kryeministrin Edi Rama të enjten e 20 korrikut, në lidhje me çështjen e ish-zëvendëskryeministrit Arben Ahmetaj dhe inceneratorët.
Në një komunikim për mediat pas përfundimit të mbledhjes, Bardhi tha se ata nuk do të pranojnë ta zhvillojnë interpelancën me një person tjetër të deleguar nga Rama, duke theksuar se kërkesa i është drejtuar kreut të qeverisë.
Bardhi u ndal edhe te ligji për legalizimin e kanabisit për qëllime mjekësore, teksa tha se kalimi i tij është bërë në shkelje të rregullores. Sipas bardhit, ligji nuk është kërkuar nga qytetarët, por nga grupet kriminale.
“Kemi depozituar kërkesën për të thirrur të enjten në një interpelancë urgjente kryeministrin Edi Rama në lidhje me aferën e inceneratorëve. Duhet në mënyrë urgjent kryeministri të japë llogari për procedurat e paligjshme në të 3 koncensionet dhe të informoi opinionin publik se si me paratë e buxhetit të shtetit po financohet arratia e 3 mafiozëve të inceneratorëve.
Ligji për kanabisin nuk është kërkesë e qytetarëve, por e grupeve kriminale. Kërkesa për interpelancë është drejtuar ndaj Ramës dhe është detyrim i tij për të zhvilluar interpelancën. Ajo aferë është aferë personale e tij, pagesat që bëhen sot nga buxheti i shtetit janë pagesa që mund t’i ndali vetëm ai. Ne nuk do lejojmë interpelancë me një person të deleguar nga Rama, kërkojmë interpelancë me kryeministrin”, tha Bardhi.
Kujtojmë se më 14 korrik, Kuvendi i hapi rrugën arrestimit të Ahmetajt, duke votuar pro kërkesës së SPAK. Ndërkohë Gjykata e Posaçme ende nuk ka dalë me një vendim zyrtar mbi pranimin ose jo të kërkesës së SPAK-ut për arrestimin e ish-zëvendës Kryeministrit Arben Ahmetaj dhe ushtrimin e kontrollit të banesës së tij.
