Tensionet në distancë mes Edi Ramës dhe Albin Kurtit përsa i përket zgjidhjes së situatës në veri të Kosovës, nuk i pengojnë të dy kryeministrat që të ulen në të njëjtën në tryezë ditën e mërkurë në Gjakovë.
Në takimin e 9 të qeverisë së Shqipërisë dhe Kosovës, dhe të tretin mes kabinetit Rama dhe atij të Kurtit, i cili do të mbahet në teatrin e Gjakovës fokusin kryesor do ta kenë marrëveshjet për lehtësimin e lëvizjes së lirë si dhe njohja e ndërsjelltë e ushtrimit të profesionit të avoktatit.
Janë 13 marrëveshje, në bujqësi dy, në fushën e mbrojtjes, por më e rëndësishmja ka të bëjë me një deklaratë të përbashkët të dy ministrave që dakordësohen që në pikën kufitare kontrollet të zhvillohen në mënyrë të rastësishme gjatë gjithë vitit, jo vetëm në sezon veror.
Situata në veri të Kosovës me gjasë do të jetë pjesë e bisedave, qoftë informale mes dy kryeministrave. Por Odeta Barbullushi, këshilltarja e Ramës për politikën e jashtme tregon se takimi simbolizon politikisht edhe mbështetjen e Shqipërisë ndaj shtetit të Kosovës.
Kjo mbledhje do të ketë edhe një mesazh politik për të treguar që marrëdhënia mes dy vendeve është e posaçme. Shqipëria ka qenë dhe është në mbështetje të saj, si për aderimin e në institucionet ndërkombëtare dhe për njohjet.
Në takimet mes kabineteve të Ramës dhe Kurtit janë firmosur 41 marrëveshje, ku 39 prej tyre kanë gjetur zgjidhje në terren.
