Një prej kriminelëve më të kërkuar në Itali, Rocco Morabito, ka mbërritur në Romë pasi u ekstradua nga Brazili.
I njohur si “Mbreti i kokainës së Mialnos”, ish-bosi i ‘Ndrangheta-s u arrestua majin e kaluar në Brazil, ku ishte fshehur, pas një operacioni të policisë vendase dhe asaj italiane. 55-vjeçarin do të vuajë tanimë dënimin me 30 vite burg, pasi është shpallur fajtor për trafik narkotikësh.
Ai kaloi vite të tëra në Amerikën e Jugut, me identitet të rremë, ku punonte me anëtarë të tjerë të organizatës kriminale kalabreze.
I lindur në qytezën Afriko (Africo) dhe me lidhje me bosin famëkeq të ‘Ndragheta-s, Giuseppe Morabito, Rocco ngjiti shpejt shkallët në hierarkinë e organizatës me një rrjet kriminal që tejkalonte kufijtë e Italisë. Ai dominoi tregun e kokainës në Milano, duke e trafikuar lëndën narkotike në qytet direkt nga Amerika e Jugut.
Nga përgjimet e policisë italiane ai dëgjohet të negociojë për importimin e më shumë se 1 toni kokainë nga Amerika e Jugut. Më pas autoritetet besojnë se u arratis në Brazil, ku jetoi me identitetin e rremë Francisco Capeletto. Nga aty, ai u vendos në Uruguai, ku jetoi për 13 vite në Punta del Este.
Atje, Morabito lëvizte me një makinë modeste dhe ra në sytë e autoriteteve vetëm pasi organizoi një festë luksoze për ditëlindjen e të bijës. Kur e regjistroi në shkollë me emrin e vërtetë, policia nisi ta përgjonte. Dhe kur, në shtator 2017, u largua nga shtëpia pas një sherri me bashkëshorten, dhe u vendos në një hotel në Montevideo, policia e arrestoi. Gjatë operacionit iu sekuestruan 13 telefona celularë dhe 150 foto për pasaporta, ku Morabito ishte i maskuar në mënyra të ndryshme.
Në vitin 2019, pasi kishte qëndruar dy vite pas hekurave, ai u arratis bashkë me 3 të burgosur të tjerë, përmes një vrime në tarracën e burgut. Pas dy vitesh kërkime, më në fund ai u pikas në Joao Pessoa në vitin 2021 ku edhe u arrestua. Pas një viti, Gjykata e Lartë Federale e Brazilit, miratoi ekstradimin drejt Italisë.
