Hetuesit e FBI-së që kontrolluan pronën e Harold Martinit në Maryland në vjeshtën e vitit 2016, gjetën dokumente të klasifikuara, duke përfshirë materiale në nivelin “top sekret” të shpërndara rreth shtëpisë së tij, në makinë dhe në depon e magazinimit.
Ndryshe nga ish-presidenti Donald Trump, ish-kontraktori i Agjencisë Kombëtare të Sigurisë nuk i kundërshtoi akuzat, duke u deklaruar fajtor në vitin 2019. Ai pranoi se veprimet e tij ishin “të gabuara, të paligjshme dhe shumë të dyshimta”.
Por deklaratat e tij penduese, si dhe pranimi i fajësisë për një akuzë të vetme, atë të ruajtjes me dashje të informacionit të mbrojtjes kombëtare, nuk e kursyen, pasi ai mori një dënim të ashpër prej nëntë vitesh burg.
Zgjidhja e këtij rasti duket si një udhërrëfyes ogurzi për rrezikun ligjor me të cilin mund të përballet Trump, pasi ai përballet me 37 akuza për krime, 31 sipas të njëjtit statut shekullor të Aktit të Spiunazhit, i përdorur për të ndjekur penalisht Martinin dhe të pandehurit e tjerë që pretendohet se kanë mbajtur në mënyrë të paligjshme dokumente të klasifikuara.
Edhe shumë njerëz si Martini, të cilët e kanë pranuar fajin dhe kanë pranuar përgjegjësinë, janë dënuar me shumë vite burg.
“Kur ata vendosin të ndjekin një rast keqtrajtimi të qëllimshëm, është për të dërguar një mesazh: që ne i marrim këto raste shumë seriozisht,”- tha Michael Zweiback, një avokat mbrojtës dhe ish-prokuror i Departamentit të Drejtësisë. “Ata pothuajse gjithmonë dënohen me burg.”
Se me sa kohë burg mund të përballet ish-presidenti në rast të një dënimi, është e pamundur të thuhet, pasi një vendim i tillë, në fund të fundit, do të merret nga gjyqtari, në këtë rast një i emëruar i Trump-it, i cili tashmë ka demonstruar gatishmëri për të vendosur në favor të tij.
Është gjithashtu e vështirë të dihet shkalla në të cilën faktorë të tjerë, përfshirë ndërlikimet logjistike dhe politike të burgosjes së një ish-presidenti, mund të luajnë rol.
Vepra penale e Aktit të Spiunazhit dënohet deri në 10 vjet burg, megjithëse rrallë ndodh që shkelësit federalë t’i afrohen maksimumit. Por përtej mbajtjes së dokumenteve, prokurorët kanë identifikuar edhe faktorë të shumtë rëndues në sjelljen e dyshuar të Trump, duke e akuzuar atë se kërkon të përfshijë dhe të tjerë, duke përfshirë edhe një ndihmës të tij, për të fshehur të dhënat nga hetuesit dhe për t’ua treguar disa vizitorëve.
Disa nga pikat e tjera në aktakuzë, duke përfshirë komplotin për të penguar drejtësinë, shkojnë deri në 20 vjet burg.
Këtë muaj, një oficer i inteligjencës në pension i Forcave Ajrore i quajtur Robert Birchum, u dënua me tre vjet burg pasi u deklarua fajtor për mbajtjen e dosjeve të klasifikuara në shtëpinë e tij.
Shumë të pandehur e kanë pranuar fajin, në vend që të përballen me gjyqin, megjithëse jo të gjithë kanë shkuar në burg.
Trump, i cili gjithashtu përballet me akuza në lidhje me pagesat e “parave të heshtura” në gjykatën e shtetit të Nju Jorkut, nuk ka treguar shenja se ai mund të shkojë drejt një marrëveshjeje për pranimin e fajësisë, duke këmbëngulur fuqishëm se është i pafajshëm dhe duke sulmuar personalisht këshilltarin special të Departamentit të Drejtësisë Jack Smith, disa orë pasi u paraqit në Gjykata federale të Majamit. Apnews
