Më shumë fluturime do të anulohen, trenat do të vonohen dhe rrugët do të bllokohen nga bora në të gjithë Evropën në ditët në vijim, ndërsa parashikohet që një valë e të ftohtit të përkeqësohet, duke sjellë edhe më shumë reshje të dendura bore pas disa ditësh ndërprerjesh të udhëtimeve.
Autoritetet në Holandë u thanë njerëzve të qëndrojnë në shtëpi të mërkurën nëse është e mundur, pasi pritet një stuhi e re bore. Ministri francez i Transportit, tha se linjave ajrore u ishte urdhëruar të anulonin të paktën 40% të fluturimeve në aeroportin kryesor të Parisit, Charles de Gaulle dhe një të katërtën e fluturimeve në aeroportin më të vogël Orly. Transporti publik në rajonin e Parisit ndoshta do të ndërpritet gjithashtu nga bora, shtoi ai.
Ndërsa priten përsëri reshje bore, linja ajrore holandeze KLM tha se kishte anuluar paraprakisht 600 fluturime të mërkurën për të shmangur anulimet e minutës së fundit që mund t’i linin udhëtarët të bllokuar në aeroportin Schiphol, një nga qendrat kryesore të Evropës.
KLM kishte anuluar 400 fluturime në Schiphol të martën dhe u kishte thënë udhëtarëve, të qëndronin larg aeroportit për të parandaluar mbipopullimin.
Në Gjermani, temperaturat ranë shumë nën minus 10 gradë Celsius në jug dhe lindje të vendit dhe pjesa më e madhe e vendit ishte e mbuluar me borë.
Në Britani, Zyra Meteorologjike tha se rreziqet e motit dimëror mund të vazhdojnë gjatë gjithë javës për pjesën më të madhe të vendit. Temperaturat gjatë natës deri të martën kishin rënë deri në -12.5 gradë Celsius në Marham, Norfolk, në Anglinë lindore, duke shënuar natën më të ftohtë të dimrit deri më tani.
Bora dhe shiu i rrëmbyeshëm kanë shkaktuar gjithashtu kaos në të gjithë Ballkanin Perëndimor, duke mbyllur rrugët, ndërprerë energjinë elektrike dhe shkaktuar përmbytje të lumenjve.
