Një goditje e fortë duket se i është dhënë krimit ekonomik dhe pastrimit të parave në jug të vendit. Prokuroria pranë Gjykatës së Shkallës së Parë të Juridiksionit të Përgjithshëm Sarandë, në bashkëpunim me specialistët e Hetimit të Krimit Ekonomik dhe Financiar në Drejtorinë e Policisë Vlorë, ka sekuestruar pasuri të paluajtshme dhe të luajtshme me vlerë totale rreth 12 milionë euro, të dyshuara se kanë buruar nga veprimtaria kriminale.
Janë regjistruar dy procedime penale, me hetime ndaj shtetasve K. Q. (alias J. H.), 43 vjeç, dhe A. K., 53 vjeç, të dy banues në Sarandë. Sipas Prokurorisë, të dy personat kanë precedentë kriminalë në fushën e narkotikëve, dhe janë të dyshuar për kryerjen e veprës penale “Pastrimi i produkteve të veprës penale ose veprimtarisë kriminale”.
Detaje mbi pasuritë e sekuestruara
Masat e sekuestros preventive janë vendosur me vendime të Gjykatës së Sarandës dhe të Apelit, dhe përfshijnë pasuri të konsiderueshme, kryesisht në sektorin e ndërtimit dhe tregtisë:
Pasuritë e 43-vjeçarit (K. Q./J. H.) të sekuestruara përfshijnë dy objekte madhore në qytetin bregdetar të Sarandës:
Një hotel 6-katësh, me 37 dhoma, së bashku me një garazh prej 440 m².
Një hotel 4-katësh, me 15 dhoma, së bashku me një lokal.
Pasuritë e sekuestruara nga 53-vjeçarit (A. K.) janë të shtrira në disa qytete kryesore të vendit:
Sarandë- Lokal shërbimi dhe pasuri të tjera.
Tiranë- Një apartament, dyqan dhe parcelë ndërtimi.
Rradhimë (Vlorë) dhe Memaliaj (Tepelenë)- Truall dhe pasuri të ndryshme.
Pasuri të luajtshme janë 1 mjet lundrues (skaf/jaht), 4 automjete dhe 12 llogari bankare.
Prokuroria e Sarandës bën të ditur se puna po vijon intensivisht për identifikimin dhe sekuestrimin e aseteve të tjera që mund të jenë regjistruar në emër të personave të tjerë, apo familjarëve të dy shtetasve të hetuar, si pjesë e skemës së pastrimit të parave.
