Dukesha e Sussex-it, Meghan Markle, e njohur për dashurinë e saj ndaj shtëpisë dhe aftësitë në gatim, pjekje e dekorim, të cilat i tregoi në serinë e saj në Netflix, “With Love”, Meghan, ka ndarë për herë të parë një kënd të ri të vilës së saj luksoze 29 milionë dollarësh në Montecito të Kalifornisë, ku jeton me bashkëshortin, Princin Harry, dhe dy fëmijët, Princin Archie dhe Princeshën Lilibet.
Më 1 nëntor, Meghan, 44 vjeçare, publikoi një video bardhë e zi në Instagram, ku shihet duke ndjekur fitoren e skuadrës së bejsbollit Los Angeles Dodgers ndaj Toronto Blue Jays në finalet e World Series – jo në stadium, por nga komoditeti i dhomës së kinemasë private në shtëpinë e saj.
Në video, duken disa divane me mekanizma relaksi në dy nivele dhe një projektor i madh, ku Meghan dhe miqtë e saj të ngushtë, përfshirë shoqen Kelly McKee Zajfen, ndoqën ndeshjen.
“Është hera e parë që shohim plotësisht dhomën e kinemasë së Princit Harry dhe Meghan Markle, edhe pse kishim parë një fragment gjatë dokumentarit të tyre në Netflix,” – thotë Rachel Avery, redaktore e rubrikës së shtëpive në HELLO!
Dhomat private të kinemasë janë zgjedhje e njohur mes yjeve dhe njerëzve të pasur, duke u mundësuar çifteve “darka romantike” pa dalë nga shtëpia.
Kjo është vetëm një nga shumë tiparet luksoze të pronës së tyre në Montecito, e cila përfshin edhe palestër, pishinë private, fushë tenisi dhe garazh për pesë makina.
Videoja vjen pas pjesëmarrjes së Meghan dhe Harry-t në ndeshjen e katërt të World Series në Dodger Stadium më 28 tetor.
Pavarësisht dashurisë për shtëpinë, Meghan ka qenë e vendosur të mos e shfaqë rezidencën e saj private në serinë e Netflix-it.
“Dëshiroja ta mbroja atë strehë të sigurt. “Jemi një familje e ngushtë dhe i dua ato momente – kur e vë Lilin për të fjetur, kur hamë drekë bashkë, është koha më e shenjtë në fund të ditës”, i tha ajo revistës “People”.
Për këtë arsye, seria u xhirua në një fermë të marrë me qira në Montecito, vetëm disa kilometra larg shtëpisë së tyre të vërtetë.
Çifti bleu pronën aktuale në korrik të vitit 2020, shtatë muaj pasi shpallën tërheqjen e tyre nga detyrat e larta mbretërore.
Para kësaj, ata jetonin në Frogmore Cottage në Windsor, që nga maji 2019.
