Autoritetet në shtetin qendror të Meksikës, Guanajuato, kanë zbuluar 32 trupa të pajetë në një pronë në komunën e Irapuatos, ku afro gjysma e tyre janë identifikuar deri më tani.
Sipas Zyrës së Prokurorit të Shtetit, trupat u gjetën në varre të fshehta në zonën e La Calera, në pjesën veriore të Irapuatos, rreth 320 kilometra larg kryeqytetit meksikan. Ekipet mjeko-ligjore janë në terren që nga data 30 korrik për të kryer ekzaminimet dhe për të vijuar me procesin e identifikimit.
Zbulimi ndodhi më pak se dy muaj pas një masakre me armë gjatë një feste rrugore në të njëjtin qytet, ku mbetën të vrarë 12 persona.
Guanajuato është ndër shtetet më të prekura nga dhuna në Meksikë, për shkak të përplasjeve të ashpra mes Kartelit të Gjeneratës së Re Jalisco dhe grupit rival lokal Santa Rosa de Lima. Vetëm në periudhën janar-korrik të këtij viti janë regjistruar mbi 1,500 vrasje në këtë zonë.
Varret e fshehta përdoren shpesh nga grupet kriminale për të zhdukur gjurmët e viktimave të tyre. Sipas autoriteteve, numri i personave të zhdukur në të gjithë Meksikën ka arritur shifrën alarmante prej afro 132,000.
