qytetin e Uruapanit, në perëndim të Meksikës, kryetari i bashkisë Carlos Manzo, i njohur për qëndrimin e tij të ashpër kundër karteleve të drogës, u vra me armë zjarri gjatë një ceremonie festive pranë një kishe lokale.
Ngjarja ndodhi gjatë festimeve të Ditës së të Vdekurve (Día de los Muertos), një traditë e rëndësishme kulturore.
Manzo, i cili ishte 40 vjeç, u plagos rëndë rreth orës 20:00 lokale dhe ndërroi jetë në spital pak minuta më vonë.
Ai po merrte pjesë në “Festivalin e Qirinjve” (Festival de las Velas) në qendër të qytetit, së bashku me gruan dhe djalin e tij të vogël, kur u sulmua nga një grup i armatosur.
Autoritetet federale të sigurisë konfirmuan se dy autorë u arrestuan menjëherë pas ngjarjes, ndërsa i treti humbi jetën gjatë ndjekjes nga forcat e sigurisë. Sekretari i Sigurisë Publike, Juan Carlos Oseguera Cortés, dhe Garda Kombëtare janë të angazhuar në hetimin e plotë të rastit, duke premtuar se vrasja nuk do të mbetet pa ndëshkim.
Kush ishte Carlos Manzo?
Manzo, i njohur edhe si El del Sombrero, ishte kandidat i pavarur i zgjedhur në qershor të vitit të kaluar dhe i pari kryetar bashkie i pavarur në historinë e Uruapanit, një qytet me rreth 300,000 banorë.
Ai mbante një qëndrim të fortë kundër krimit të organizuar, duke kritikuar qeverinë federale dhe shtetërore për mosveprim.
Në muajt e fundit, ai kishte publikuar edhe video live në rrjetet sociale ku shprehte frikën për jetën e tij dhe kërkonte ndihmë nga presidentja Claudia Sheinbaum për të luftuar kartelet, veçanërisht Jalisco New Generation Cartel (CJNG), që kontrollon tregtinë e avokados dhe drogës në rajon.
