Në Impiantin e Përpunimit të Mbetjeve në Tiranë puna vijon duke përfshirë të gjitha hallkat e menaxhimit modern të mbetjeve. Gjatë një inspektimi në terren, Ministri i Mjedisit Sofjan Jaupaj u shpreh se sfida kryesore e vendit mbetet diferencimi i mbetjeve në burim, një proces pa të cilin nuk mund të ketë menaxhim të qëndrueshëm.
“Diferencimi i mbetjeve në burim është një nga sfidat më të rëndësishme që kemi në menaxhimin e mbetjeve. Nuk mjaftojnë vetëm investimet në pikat fundore; Ministria e Mjedisit është e angazhuar të mbështesë të gjitha bashkitë për krijimin e infrastrukturës së nevojshme. Diferencimi duhet prezantuar dhe zbatuar me sukses nga njësitë e qeverisjes vendore,” deklaroi ministri.
Ai shtoi se objektivi është rritja e konsiderueshme e mbetjeve të ndara dhe të riciklueshme, në mënyrë që materialet me vlerë të mund të shiten e të rikthehen në ekonomi, ndërsa sasia që përfundon në landfille të zvogëlohet maksimalisht.
“Shqipëria është një territor i vogël dhe jetëgjatësia e landfilleve është e kufizuar. Përmes diferencimit dhe kapsulimit të mbetjeve po bëhet një punë e mirë dhe ne do të vazhdojmë ta forcojmë këtë proces,” u shpreh Jaupaj.
Investimet e kryera po sjellin jo vetëm rritjen e kapaciteteve të përpunimit, por edhe rikualifikimin e peizazhit përreth, ndërsa synimi kryesor mbetet rritja e sasisë së mbetjeve të rikuperuara dhe të ricikluara, për të ulur volumin që përfundon në landfill.
Një rëndësi të veçantë po merr edhe programi i edukimit mjedisor me nxënës dhe studentë, i cili po nxit ndërgjegjësim të shtuar tek brezi i ri për ndarjen dhe riciklimin e mbetjeve. /RTSH
