Tre aksidente me pasojë vdekjen kanë ndodhur në orët e para të mëngjesit të sotëm në Tiranë dhe Fier.
Në rrugën “Shaban Bardhoshi”, shtetasi D. T., duke drejtuar automjetin, ka humbur kontrollin mbi drejtimin e tij duke dalë nga rruga dhe ka hyrë në oborrin e një banese.
Si pasojë është dëmtuar shtetasja M. S., 23 vjeçe, që ndodhej në oborrin e banesës së saj, e cila më pas, ka ndërruar jetë në spital.
Grupi hetimor po punon për sqarimin e rrethanave të aksidentit.
Ky është aksident i dytë me viktima vetëm në orët e para të mëngjesit të sotëm në vend, pas atij të ndodhur në Fier.
Në orët e para të mëngjesit të sotëm, në aksin rrugor “Levan-Tepelenë” në Fier, në vendin e quajtur “Kryqëzimi i Cakranit”, një 49-vjeçar nga Kosova me iniciale F. M., 49 vjeç, duke drejtuar automjetin tip “Jeep”, ka aksidentuar me pasojë vdekjen, shtetasin H. R., 75 vjeç, banues në Cakran.
U shoqërua në Komisariat drejtuesi i mjetit dhe po kryhen veprimet procedurale.
Aksidenti i tretë ka ndodhur në Mjull Bathore në rrugën drejt TEG ku një kamionçinë është përplasur me trafikndarësen, duke humbur jetën shoferi.
‘Më datë 31.08.2022, në Mjull Bathore, një mjet tip kamionçinë me të cilën transportoheshin viça, është përplasur me trafikndarësen dhe si pasojë drejtuesi i mjetit, ende i paidentifikuar, ka ndërruar jetë. Grupi hetimor ndodhet në vendngjarje dhe po punon për sqarimin e rrethanave të aksidentit dhe identifikimin e viktimës’, thotë policia e Tiranës.
