Dy muaj nga marrja e vendimit për çeljen e bisedimeve të anëtarësimit për Shqipërinë dhe Maqedoninë e Veriut, kancelarja Angela Merkel rithekson angazhimin e saj për zgjerimin me vendet e Ballkanit. Ajo i bëri deklaratat gjatë përkujtimit të “piknikut pan-Europian”, ngjarje që shënoi rënien e Perdes së Hekurt dhe solli bashkimin e Europës Perëndimore me atë Lindore.
Europa do të jetë e bashkuar vërtet kur të gjitha vendet e Ballkanit Perëndimor të anëtarësohen në Bashkimin Europian, tha të hënën kancelarja gjermane Angela Merkel.
Deklarata e saj përfaqëson një rikthim të fortë të angazhimit të Berlinit për zgjerimin e BE-së, një ide jopopullore për disa qeveri të BE-së dhe shumë votues në Europën Perëndimore.
Një prej tyre presidenti francez Emmanuel Macron që është skeptik ndaj zgjerimit.
Merkel ishte duke folur në Hungari për shënimin e 30 vjetorit të “piknikut pan-Europian”, një ngjarje e vlerësuar si çasti kryesor gjatë rënies së Perdes së Hekurt që më pas solli bashkimin e Europës Perëndimore me atë Lindore.
Kancelarja tha se bashkësia europiane nuk do të ishte e plotë derisa i gjithë Ballkani Perëndimor të anëtarësohet në bllok.
“Nëse i shikoni gjërat nga pikëpamja gjeostrategjike dhe gjithashtu shikoni hartën, atëherë do të ketë vetëm një Europë vetëm kur asaj t’i bashkohen vendet e Ballkanit Perëndimor,” u tha Merkel gazetarëve në qytetin hungarez të Sopronit.
Gjashtë shtete të Ballkanit Perëndimor nuk janë anëtare të BE-së. Serbia, Mali i Zi, Maqedonia e Veriut dhe Shqipëria janë vende kandidate, ndërsa Bosnjë-Hercegovina dhe Kosova klasifikohen si “kandidatë të mundshëm”.
Si Serbia dhe Mali i Zi kanë qenë të angazhuara në bisedime të anëtarësimit për vite me radhë.
Ministrat e BE-së vendosën në qershor të vonojnë vendimin për fillimin e bisedimeve të anëtarësimit me Shqipërinë dhe Maqedoninë e Veriut deri në tetor, kryesisht për shkak të rezistencës së Francës dhe Holandës.
