Qeveria gjermane e drejtuar nga Kancelari Friedrich Merz ka prezantuar reforma thelbësore në shërbimin ushtarak, duke e cilësuar Rusinë si “kërcënimin më të madh për lirinë, paqen dhe stabilitetin”. Megjithëse rekrutimi mbetet vullnetar, synimi është të rritet ndjeshëm numri i ushtarëve dhe rezervistëve për t’iu përgjigjur këtij kërcënimi.
Gjermania synon të shtojë 80,000 personel aktiv për të përmbushur kërkesat e NATO-s. Objektivi është që numri i ushtarëve të shkojë nga 180,000 në 260,000, ndërsa numri i rezervistëve të arrijë në 200,000 deri në vitin 2030.
Për të tërhequr vullnetarë, qeveria ka rritur ndjeshëm kompensimin financiar. Ministri i Mbrojtjes, Boris Pistorius, theksoi se të rinjtë që kryejnë shërbimin ushtarak do të përfitojnë 2,300 euro neto në muaj, përveç akomodimit dhe ushqimit falas.
Një hap tjetër i rëndësishëm është krijimi i këtij këshilli, një projekt që kishte qenë në diskutim për më shumë se 30 vjet. Merz e cilësoi këtë si një arritje të rëndësishme të qeverisë së tij brenda katër muajsh.
Shërbimi vullnetar dhe ndryshimet e tjera
Aktualisht, shërbimi ushtarak mbetet vullnetar, megjithëse koalicioni CDU-CSU kishte preferuar një mekanizëm më të detyrueshëm. Të gjithë të rinjtë gjermanë nga 18 deri në 25 vjeç do të duhet të plotësojnë një formular për të vlerësuar disponueshmërinë e tyre, por përgjigja për vajzat mbetet opsionale.
Kjo reformë shënon një ndryshim të madh në politikën gjermane të mbrojtjes, e cila u braktis në vitin 2011 nga qeveria e atëhershme e Angela Merkel. Situata gjeopolitike, veçanërisht pas agresionit rus ndaj Ukrainës në vitin 2022, ka detyruar Gjermaninë të rishqyrtojë nevojat e saj për burime njerëzore në ushtri.
