Në një mbrëmje të madhe në Paris, FIFA ka ndarë çmimet për më të mirë në futboll për vitin 2022, ku mbi të gjithë është kurorëzuar Lionel Messi si më i miri.
Ylli argjentinas, i cili triumfoi me kombëtaren e tij edhe në Kampionatin Botëror të Futbollit, ka lënë pas rivalët e tij që i mposhti në finalen e Katarit, francezët Benzema dhe Mbappe.
“Është kënaqësi të jem këtu dhe të fitoj. Falënderoj të gjithë lojtarët dhe trajnerin e Argjentinës. Kjo është një çmim grupi. O Zot, kam mundur të fitoj Kupën e Botës! Falënderoj familjen time dhe argjentinasit që e kanë përjetuar ashtu siç e kemi përjetuar ne Kupën e Botës. Një puthje për fëmijët e mi që po më shikojnë”, u shpreh Messi mes emocioneve.
Ndërkohë, për femra ky çmim shkoi për yllin e Barcelonës, Alexia Putellas, e cila përsëriti suksesin e sezonit të kaluar. Trajneri më i miri u zgjodh trajneri i Argjentinës, Lionel Scaloni. “Është një çmim që vjen falë lojtarëve dhe është i rëndësishëm. Falënderoj 26 lojtarët për suksesin në Kupën e Botës. Faleminderit federatës argjentinase që më dha mundësinë për të fituar një Kupë Bote. Nuk ka asgjë më të bukur se sa të shohësh njerëzit e vendit tënd të lumtur. Djemtë luajtën dhe fituan për ta – deklaroi Sclaloni. – Këtë çmim ia dedikoj familjes sime”, përfundoi ai.
Kjo mbrëmje u pushtua nga argjentinasit, pasi edhe “portieri më i miri” shkoi për kampionin e botës Emiliano Martinez. “Të gjithë e dinë historinë time dhe përgatitjen e madhe që bëra duke fituar Kupën e Botës në moshën 36-vjeçare. Të qenët argjentinas dhe ngritja e Kupës së Botës ishte e pabesueshme. Falë familjes sime, Aston Villas dhe Argjentinës, kam arritur ëndrrën e jetës sime. Kur njerëzit më pyesin se cilët janë idhujt e mi, gjithmonë mendoj për babanë dhe nënën time. Ata janë idhujt e mi”, – tha Martinez.
Formacioni më i mirë
Top-11 për meshkujt përbëhet nga: Courtois, Hakimi, Cancelo, Van Dijk, De Bruyne, Modric, Casemiro, Messi, Mbappé, Benzema, Haaland.
