Presidenti Ilir Meta dhe kryeministri Edi Rama janë të ftuar të marrin sot në mbledhjen e Këshillit Kombëtar të Integrimit që do të mbahet paraditen e sotme në Pallatin e Kongreseve.
Në tryezë do të jetë dhe kreu i Delegacionit të BE në Tiranë, Luigi Soreca.
Tema e kësaj mbledhjeje është: “Zhvillimet më të fundit në kuadër të përgatitjeve për procesin e negociatave në Bashkimin Europian dhe prezantimi i projekt-planit gjithëpërfshirës të masave të integrimit europian”.
Këshilli do të mbajë fjalën e hapjes për tia kaluar më pas ambasadorit të BE-së, Luigi Soreca dhe më pas presidenti Ilir Meta.
Në sesionin e dytë do të mbajnë fjalën Genc Cakaj dhe kryeministri Edi Rama.
Mbledhja vjen në një kohë kur BE ka dhënë aprovimin për çeljen e negociatave me vendin tonë dhe kur maxhoranca dhe opozita kanë dakordësuar marrëveshjen për Kodin e Ri zgjedhor.
Cfarë është Këshilli Kombëtar i Integrimit Evropian
Këshilli Kombëtar i Integrimit Evropian (KKIE) është krijuar me Ligjin Nr. 15/2015, datë 05/03/2015, “Për rolin e Kuvendit në procesin e Integrimit Europian të Republikës së Shqipërisë ne BE” , si struktura më e lartë këshillimore kombëtare për integrimin evropian që ngrihet pranë Kuvendit, me qëllim nxitjen dhe garantimin e bashkëpunimit gjithëpërfshirës ndërmjet forcave politike, institucioneve publikë dhe shoqërisë civile, si dhe rritjen e transparencës në vendimmarrjen për çështjet e integrimit.
Detyrat kryesore të tij përfshijnë:
Nxitja e bashkëpunimit midis forcave politike, institucioneve shtetërore dhe të pavarura dhe shoqërisë civile, në procesin e integrimit të Shqipërisë në Bashkimin Europian;
Sigurimi i diskutimit të vazhdueshëm për politikat e integrimit europian, të zbatuara nga institucionet shtetërore, me shoqërinë civile dhe me aktorë të tjerë të interesuar;
Monitorimi i zbatimit të detyrimeve për hapjen e negociatave me Bashkimin Europian;
Analizimi i kuadrit ekzistues normativ dhe praktikave, në lidhje me procesin e integrimit europian, për çështjet që merr në shqyrtim;
Sigurimi i bashkëpunimit të vazhdueshëm për procesin e integrimit me komisionet e përhershme parlamentare dhe me strukturat e tjera përgjegjëse për integrimin europian;
Monitorimi i ecurisë së procesit të negociatave/bisedimeve për anëtarësim.
