Ftesës urgjente që ambasadori i BE-së, Luigi Soreca i bëri palëve politike përmes një deklarate të postuar në facebook nuk kaloi pa vëmendjen e presidentit Ilir Meta, i cili një ditë më parë adresoi akuza ndaj faktorit ndërkombëtarë.
Kreu i shtetit hartoi 10 pyetje për kreun e delegacionit të BE-së që konsistojnë pikërisht tek dialogu.
“Presidenti i Republikës përshëndet nxehtësisht thirrjet e sinqerta të ambasadorit Soreca për “pjekuri politike dhe për angazhimin urgjentisht në një dialog politik për të kapërcyer situatën aktuale”.
Me këtë rast Presidenti ka disa pyetje publike:
A ishit ju realisht për nxitjen e dialogut mes palëve më parë z.Ambasador?
A morët ju ndonjë nismë konkrete për vendosjen e këtij dialogu mes palëve?
A i kërkuat ju mbështetjen Presidentit për dialog, me qëllim që t’ja kursenim shfaqjen e shëmtuar të 30 qershorit Shqipërisë dhe së ardhmes së saj europiane?
A e dini ju që Presidenti mori një nismë për anullimin e zgjedhjeve me qëllim vendosjen e dialogut mes palëve?
Përse nuk e mbështetët ju Presidentin në këtë inisiativë publikisht?”
Kreu i shtetit shkon dhe më tej duke iu referuar nismës së zyrtarëve të bundestagut gjerman, që ishte pikënisja e presidentit për anulimin e 30 qershorit.
“A e dini ju që në 24 maj 2019 përfaqësuesit zyrtarë të grupit kryesor në Bundestag, deputetët Wadephul dhe Schmidt, përmes një qëndrimi zyrtar kërkuan vendosjen urgjent të dialogut për zgjidhjen e krizës, madje u ofruan për moderimin e këtij dialogu me qëllimin e mirë për të ndihmuar në çeljen e negociatave të anëtarësimit me BE-në dhe theksuan edhe rëndësinë e një date të re për zgjedhjet vendore, që të ishin demokratike dhe gjithpërfshirëse, si domosdoshmëri për të ndihmuar çeljen e negociatave?
A e dini ju që Presidenti menjëherë reagoi duke mbështetur këtë nismë dhe tregoi vullnetin e tij për të dekretuar një datë të re të zgjedhjeve, pas dakordësimit të palëve?
A e dini ju që Presidenti i Republikës ka dekretuar datën 13 tetor 2019, për zhvillimin e zgjedhjeve lokale gjithpërfshirëse? Çfarë qëndrimi keni ju?
A e keni sqaruar z.Rama se zgjedhjet pa opozitën nuk plotësojnë kriteret e Kopenhagës, shkelin parimet e Marrëveshjes së Stabilizim-Asociimit dhe pamundësojnë çeljen e negociatave të anëtarësimit në tetor 2019?
A e dini ju që po dje Presidenti ka theksuar, duke patur parasysh rëndimin e krizës politike në vend, që 13 tetori 2019 të jetë jo vetëm data e zgjedhjeve lokale, por edhe e atyre parlamentare dhe presidenciale, për t’i dhënë fund njëherë e mirë kësaj krize të thellë dhe të gjithanshme të përfaqësimit në vend? “
Ju e dini shumë mirë, që ditën e parë që keni mbërritur këtu, se një nga shqetësimet dhe vërejtjet e mia për Delegacionin e BE gjatë gjithë këtyre viteve ka qenë se nuk ka bërë përpjekjet më të mira për të nxitur një dialog real midis palëve.
Kaq i ashper presidenti pritet të jetë dhe për reformën në drejtësi dhe Gjykatën Kushtetuese. Ai e paralajmëron dhe në letër
“Për pyetjet e tjera për Reformën në Drejtësi dhe Gjykatën Kushtetuese do vijoj më vonë, por dialogu, temat, mënyrat dhe objektivat e tij të përcaktura qartë janë prioriteti numër një për momentin, sipas mendimit tim.”
Në herët akuzoi Ramën se e ka bërë reformën sipas Bienales së Venecias sepse është thjesht një Artist. Ndërkohë kreu i delegacionit të BE-së nxit ngritjen e Gjykatës Kushtetuese.
