Presidenti i Republikës Ilir Meta ka nisur vizitën zyrtare disa ditore në SHBA.
Meta ishte ftuar në darkën zyrtare të Departamentit Amerikan të Shtetit me Aleancën Ndërkombëtare për Mbrojtjen e Lirive Fetare.
Presidenti Meta i ftuar zyrtarisht nga Sekretari Amerikan i Shtetit, Mike Pompeo, bën të ditur zyra për shtyp e Presidentit të Republikës.
Gjatë qëndrimit në SHBA, Presidenti Meta pritet të takojë zyrtarë të lartë të Administratës Amerikane, në Kongres dhe në Senat.
“I nderuar të merrja pjesë në darkën zyrtare të organizuar në Departamentin e Shtetit, nga Sekretari Amerikan i Shtetit, Michael Pompeo, me Aleancën Ndërkombëtare për Mbrojtjen e Lirive Fetare”, u shpreh Meta.
“Unë konfirmova në fjalën time se Shqipëria do vazhdojë të jetë shembull i harmonisë ndërfetare dhe një mbështetëse aktive e Aleancës”, theksoi ai.
“Së bashku me SHBA dhe partnerët tanë, përmes Deklaratës së Parimeve, forcuam angazhimin e përbashkët për mbrojtjen dhe avancimin e lirisë së besimit, si një e drejtë themelore e njeriut dhe për të kundërshtuar çdo forme dhune e shkelje të saj, kudo që të shfaqet”, tha Presidenti Meta.
