“Vrasja e të miturit ditën e djeshme në qytetin e Fierit, nga një person me precedentë penalë, është thirrje alarmuese për institucionet shtetërore dhe tregues i mosfunksionimit të zinxhirit të sistemit, nga vënia e drejtësisë, deri te ndëshkimi e më pas rehabilitimi” thuhet në reagimin e presidentit Ilir Meta lidhur me krimin makabër të ndodhur në Fier, ku Mateo 8 vjeç u rrëmbye, vra dhe u gropos nga fqinji i tij, Klodian Çalamani.
Ngjarja e rëndë u zbulua mbrëmjen e djeshme në fshatin Grecalli në Fier.
Më tej kreu i shtetit kërkon të identifikohen dhe bashkëpërgjegjësit e këtij krimi makabër.
“Krimi makabër i djeshëm, që i mori jetën një fëmije të pafajshëm, ka autor, por ka dhe bashkëpërgjegjës, që nuk kanë përmbushur detyrimet shtetërore, duke krijuar terrenin për këtë vepër penale. Nuk mjafton, që përfaqësuesit e institucioneve të dalin me shprehje tronditëse për ngjarjen dhe ta dënojnë atë.
Duhen ndërmarrë nisma konkrete për të forcuar hetimin, parandalimin e veprave të tilla nga individë, që dukshëm kanë premisat për të qenë recidivistë dhe për t`u përfshirë në krim, dhe për të cilët sistemi rehabilitues penitenciar dhe i post vuajtjes së dënimit, nuk ka funksionuar. “
“Nuk kam fjalë për të ngushëlluar familjen e të voglit Mateo. Zoti dhe drejtësia ua lehtësoftë dhembjen!” mbyll komentin e tij në face book presidenti Ilir Meta.
