Presidenti Ilir Meta e ka nisur ditën me një urim ndaj qytetarëve të Kosovës.
Nëpërmjet një statusi në rrjetet sociale ai shkruan se përshëndet pjesëmarrjen e qytetarëve në votime në kushte të vështira si dhe besimin për demokracinë dhe votën e lirë.
Meta shkruan se Kosova hapi një faqe të re në rrugëtimin e saj drejt Evropës.
“Urime të gjithë qytetarëve dhe klasës politike të Kosovës për shembullin e shkëlqyer të besimit te demokracia dhe vota e lirë, si dhe për standardet e suksesshme të arritura në zgjedhjet e djeshme parlamentare.
E përshëndes pjesëmarrjen e lartë të qytetarëve në votime, të cilët sfiduan kushtet e vështira atmosferike dhe pandeminë COVID-19, për të marrë në dorë fatet dhe për të vendosur të ardhmen e tyre.
Kosova hapi një faqe të re në rrugëtimin e saj europian dhe konsolidimit të shtetit demokratik.
Urojmë, që institucionet e reja, që do të formohen përmes bashkëpunimit, të udhëheqin me sukses shtetin e Kosovës për të fituar sfidat e të ardhmes.” shkruan Meta
