Presidenti Ilir Meta ka përcjellë këtë të mërkurë një dekret për rikthimin për shqyrtim në parlament të ligjit për ‘Statusin e gjyqtarëve dhe prokurorëve’.
Meta ka dhënë argumentat e tij në lidhje me dy momente të ndryshimeve ligjore të kryera nga socialistët, që sipas tij janë anti-kushtetuese dhe në shkelje të plotë të ligjit.
Së pari me procesin e betimit të magjistratëve të lartë dhe më tutje në lidhje me dhënien e disa kompetencave shtesë për Kreun e Inspektoriatit të Lartë të Drejtësisë (ILD).
Meta shkruan në lidhje me betimin e gjyqtarëve se ndryshimi që kanë sjellë socialistët deformon rëndë institucionin e Presidencës.
“Parashikimi i një alternative të ceremonisë së betimit, duke synuar që betimi me shkrim jo në prani të një autoriteti të lartë shtetëror dhe dërgimi/postimi i tij, të kthehet në një rregull të përgjithshëm, synon të deformojë rëndë këtë institut, që tregon përgjegjshmërinë, ndërgjegjshmërinë dhe angazhimin e subjektit që merr një detyrë të rëndësishme.”-shkruan Meta ndër të tjera.
Në lidhje me ndryshimet për kompetencat e shtuara të ILD-së, Meta argumenton se të tilla ndryshime bien ndesh me kushtetutën dhe ligjet në fuqi.
“…në asnjë moment, sipas normës kushtetuese, Inspektorit të Lartë të Drejtësisë nuk i është dhënë tagri për të kryer verifikimin e pasurisë. Verifikimi i pasurisë dhe figurës, për magjistratët në detyrë, është zgjidhur me ligjin e posaçëm për rivlerësimin kalimtar, në zbatim të parashikimeve kushtetuese.”-shkruan Meta.
Kujtojmë se ndryshimet e ligjit e veçanërisht pjesa e kompetencave për kryeinspektorin e Lartë të Drejtësisë, kanë ardhur nga qeveria si nevojë e krijimit të një mekanizmi për të luftuar atë që kryeministri Rama e ka cilësuar si ‘anti-KÇK’ e vërtetë, thënë ndryshe pjesa e gjyqtarëve e prokurorëve të korruptuar. Konkretisht kreu i ILD-së përmes ndryshimeve ligjore ka të drejtën që t’i kërkojë pezullimin e një gjyqtari dy organeve ‘qeverisëse’ të gjyqësorit, siç janë Këshilli i Lartë i Prokurorisë dhe ai i Gjyqësorit. Para ndryshimit ligjor, kreu i ILD-së nuk kishte të drejtë ligjore të kërkonte pezullimin e gjyqtarëve apo prokurorëve.
Kujtojmë se Meta e firmosi para protestuesve në tubimin e të hënës, teksa sot ka dhënë të gjithë argumentat ligjorë mbi arsyet që e kanë shtyrë të mos e pranojë ligjin.
Kujtojmë gjithashtu se Presidenti ka paralajmëruar maxhorancës, që nëse nuk e merr seriozisht këtë dekret, atëherë pas 15 marsit ai do të bëhet gati që të firmosë brenda sallës së parlamentit, shpërndarjen e këtij të fundit.
