Kreu i Partisë së Lirisë, Ilir Meta ka sulmuar institucionet e drejtësisë. Reagimi i Metës erdhi pasi u pyet nga gazetarët nëse ka frikë nga SPAK, referuar deklaratave të Altin Dumanit se nuk ka rëndësi emri Ilir Meta apo Edi Rama për çështje në hetim, pasi presionet politike nuk u bëjnë përshtypje.
Meta hodhi akuza se prokurorë të lidhur me Ramën kanë marrë angazhime personale për ta goditur.
Ai sulmoi edhe Altin Dumanin, duke e quajtur ‘zar’ të ish-kryeprokurorit Arben Rakipi dhe se po tenton të godasë Metën, që sipas tij ka mbrojtur reformën në drejtësi.
“S’kam asnjë koment për këtë deklaratë. Kam qenë gjithë jetën në hetim, e di që gjithashtu prokurorë jo që flirtojnë me politikën, që janë prodhimi më i drejtpërdrejtë të saj kanë marrë angazhime personale për tu marrë me Metën për arsye që i dinë mirë. Unë jam këtu, do jem gjithmonë këtu. Të jeni të sigurt se nuk ka asnjë forcë që mundet të zhbëjë PL si një parti të të vërteta të mëdha dhe njëkohësisht nuk ka asnjë zar të Arben Rakipit që për të legjitimuar kapjen e reformës në drejtësi nga Rama përmes shkatërrimit të proceseve kushtetuese, që nga zgjedhja e prokurorëve të përgjithshëm, betimet e anëtarëve të GJK tek lana, e gjithë ato bëma të tjera, të godasë Ilir Metën që mbrojti reformën në drejtësi. Mbrojtje që u konfirmua edhe nga vetë komisioni i Venecias. Lidhur me përpjekjet e Ramës për ta kthyer SPAK në një komisariat policor anti-opozitë për të shkatërruar pluralizmin politik nuk jam i surprizuar. Asnjëherë s’kam dashur të identifikoj këtë institucion me individë të caktuar që nuk flirtojnë me politikën, por janë prodhim i saj dhe para se të bënin betime me dorën në Kushtetutë kanë bërë betime të tjera që koha po i provon më së miri”, tha Meta.
