Presidenti Ilir Meta është rikthyer me takimet në Vlorë, por këtë herë duke ndalur dhe në konferencë për mediat. Duke iu kundërpërgjigjur akuzave të Ramës ai thekson se në krye të shtetit është zgjedhur nga PS dhe jo nga LSI. teksa ka kujtuar se në luftë nga fshati i tij kanë zbritur tre çeta për të mbështetur partizanët në qytetin bregdetar.
“Lufta” politike mes presidentit Meta dhe kryeministrit Edi Rama 2 muaj para zgjedhjeve parlamentare është zhvendosur nga Tirana në Vlorë.
Kreu i Shtetit është kujdesur që bashkëbisedimin me gazetarët ta bëjë pas orarit zyrtar të punës, ndërsa shpjegoi sepse ka zgjedhur një nga zonat elektorale të Edi Ramës, për t’ju përgjigjur Kreut të qeverisë.
Meta: Sa herë të shpifin nga Vlora për presidentin Ilir Meta unë nuk do të përtoj por do të vi këtu në Vlorë të jap përgjigje.
Madje Kreu i Shtetit i kujton Ramës edhe lidhjen historike të tij me zonën e Vlorës.
Meta: Unë vi nga një krahinë që si gjeografi është larg nga Vlora, ajo krahinë ka sjellë tre çeta në luftën e Vlorës në 1920 dhe një çetë e vetme ka qenë vetëm nga fshati ku kam lindur unë nga Çepani i Skraparit.
Gjatë pasdites me diell në qytetin bregdetar, Ilir Meta kërkoi të hedhë poshtë akuzat e ish-aleatit të tij që Presidenti zhvillon takime të fshehta kundër qeverisë dhe në interes të LSI-së.
Meta: Fushatë mashtrimi e orkestruar nga kryeoligarku i Shqipërisë. Pse përpiqen këta të krijojnë një mashtrim publik që Presidenti lëvizka natën dhe ardhka vetëm natën? Pse nga kush ka frikë Presidenti në Vlorë? Presidenti është i keq sepse mbron pronën e qytetarëve dhe të drejtat e tyre. Sepse Presidenti nuk mban anën e oligarkëve. Sa i takon çështjes që unë jam zgjedhur nga LSI, kjo është një gënjeshtër sepse unë jam zgjedhur vetë nga Edi Rama si President i Shqipërisë.
Për largimet e LSI-së drejt PS, Ilir Meta ka një këndvështrim tjetër nga ish-ministrat dhe të besuarit e tij.
Meta:Jam shumë i surprizuar nga fakti që LSI në Berat paska pasur më shumë anëtare se Partia Komuniste e Kinës.
Por Meta u kërkon partive politike që të bëjnë një fushatë elektorale me programe dhe në listat e tyre të kenë kandidatë me integritet.
Meta: Të mos preken nga dekriminalizimi dhe si parti të mos bëhet strehë e atyre që pastron partia tjetër.
Presidenti apelon shqiptarët që me 25 prill t’i drejtohen kutive të votimit për t’i rikthyer dinjitetin vendit.
Meta: Me pasaporta, me karta, me shpata, me çdo gjë shqiptarët do të shkojnë të votojnë në 25 prill, kjo histori ka përfunduar.
