Presidenti Ilir Meta deklaroi sot nga Durrësi se “nga 25 prilli ora e Shqipërisë do të ecë përpara dhe do të ecë me shpejtësi të madhe për të fituar edhe kohën e humbur, edhe për të rikthyer shpresën se në këtë vend që të gjithë janë të barabartë përpara ligjit dhe këtë e garanton vetëm barazia e votës”.
“Këto tridhjetë vite kemi pasur një rrugë me shumë ulje-ngritje. Shpesh ora e Shqipërisë ka ndaluar. Ka mbetur prapa. Ky është një fillim. Presidenti është në kontakte të vazhdueshme – do t’u bëjë letër edhe të gjitha subjekteve garuese për të bashkëpunuar. Jam në një proces të vazhdueshëm të dokumentimit të çdo fenomeni dhe problematike”, tha Meta.
Ai ftoi mediet gjithashtu që të jenë mjaft transparente në këtë proces. “Është në të mirën e tyre pasi ato duhet të respektojnë qytetarët, duhet t’i raportojnë fenomenet në kohë dhe duhet të japin një kontribut për atë që do të vijë nesër që është një shoqëri plotësisht demokratike. Dhe njëkohësisht për të qenë të gjithë me sa më rrethana lehtësuese përpara sistemit të llogaridhënies që do të vendoset me hir e me pahir falë votës së qytetarëve shqiptarë më 25 prill”, shtoi ai.
Meta tha se “kjo nismë nuk synon që të zëvendësojë institucionet që kanë detyrat e tyre sipas ligjit për të mbrojtur zgjedhjet dhe për të bërë punën e tyre, por ne e dimë ngaqë kjo punë nuk është bërë në të kaluarën, këto fenomene kanë ndodhur dhe ka shumë mundësi që të përsëriten”.
“Kështu që nisma e Presidentit u bënë mirë që të gjithëve që ta marrin sa më seriozisht dhe të tregojnë integritetin e tyre përballë këtij momenti historik në të cilin ndodhet i gjithë vendi ynë”, shtoi ai, duke folur mbi nismën për vënien e dy numrave të telefonave në dispozicion për denoncimin e krimit zgjedhor.
