Ministri britanik i Transportit, Grant Shapps ka paralajmëruar se uria, e shkaktuar nga mungesa e drithit dhe ushqimit për shkak të pushtimit të Ukrainës, mund të shkaktojë më shumë vdekje sesa vetë lufta.
Deklaratën ai e bëri pas një takimi me homologun e tij ukrainas, Oleksandr Kubrakov në Gjermani javën e kaluar për të diskutuar se si mund të sigurohet ndihma për të garantuar eksportimin e grurit.
“Unë mendoj se është absolutisht thelbësore që ne ta arrijmë këtë nëse nuk duam të përballemi me urinë”, ka deklaruar ai.
Marina Mbretërore mund të dërgojë anije luftarake në Detin e Zi për të mbrojtur anijet që transportojnë grurë ukrainas, sipas raporteve.
Aleatët e Ukrainës janë të prirur të krijojnë një “koalicion të të gatshmëve” për të thyer bllokadën ruse dhe për të krijuar një “korridor mbrojtës” nga Odesa në Bosfor.
Kjo vjen mes frikës në rritje që po mbaron koha për të parandaluar një krizë botërore ushqimore në shumë vende, veçanërisht ato në zhvillim./ La Republica
