Ministri i Jashtëm gjerman Johann Wadephul deklaroi në Zagreb se Kroacia mund të luajë një rol kyç për të përshpejtuar procesin e anëtarësimit të Kosovës dhe vendeve të Ballkanit Perëndimor në Bashkimin Evropian.
Gjatë një takimi me homologun kroat Gordan Grlić Radman, Wadephul theksoi se procesi i zgjerimit të BE-së nuk është vetëm teknik, por edhe gjeopolitik, dhe se Kroacia, si anëtare e fundit e BE-së që nga viti 2013, ka përvojën dhe pozicionin për të ndihmuar në këtë drejtim.
“Kroacia mund të jetë një shoqëruese vendimtare për të dhënë një shtysë të re zgjerimit të BE-së për Ukrainën, Moldavinë dhe vendet e Ballkanit Perëndimor,” tha Wadephul, politikani i CDU-së, transmeton DW.
Ai shtoi se anëtarësimi në BE është një çështje gjeopolitike, duke paralajmëruar kundër ndikimit të autokratëve që përpiqen të destabilizojnë rajonin përmes dezinformimit dhe korrupsionit, pa përmendur drejtpërdrejt vende si Rusia apo Kina.
Procesi i anëtarësimit për vendet e Ballkanit Perëndimor – Malin e Zi, Serbinë, Shqipërinë, Maqedoninë e Veriut, Bosnjën dhe Hercegovinën dhe Kosovën – ka ngecur. Mali i Zi është më i përparuari, por ende pa një datë të caktuar për anëtarësim.
Negociatat me Serbinë dhe Malin e Zi kanë nisur që nga viti 2012 dhe 2014, ndërsa me Shqipërinë dhe Maqedoninë e Veriut në 2022.
Bosnja ka statusin e vendit kandidat, por negociatat ende nuk kanë filluar, ndërsa Kosova mbetet kandidat potencial.
Wadephul theksoi se BE-ja duhet të reformohet nga brenda për të qenë e aftë të përballet me sfidat gjeopolitike, ndërsa Kroacia ka një rol “thelbësor” për të forcuar kohezionin dhe ndikimin e Evropës.
Nga ana e tij, ministri kroat Radman rikonfirmoi angazhimin e vendit të tij në negociatat e BE-së me Ballkanin Perëndimor, duke shtuar se rajoni i përket gjeopolitikisht dhe gjeostrategjikisht Evropës dhe se Kroacia kundërshton ndikimin e palëve të treta.
