Ministri i Jashtëm i Kinës, Wang Yi, do të nisë të hënën një vizitë katër-ditore në Rusi për bisedime për sigurinë, tha ministria e tij e jashtme.
Agence France-Presse raporton se udhëtimi i tij është i fundit në një seri vizitash dhe telefonatash të nivelit të lartë midis dy palëve, të cilat kanë një partneritet “pa kufij”.
Ministria e Jashtme e Kinës tha në një deklaratë të hënën se Wang do të shkojë në Rusi për “raundin e 18-të të konsultimeve strategjike të sigurisë Kinë-Rusi” nga 18 deri më 21 shtator me ftesë të Nikolai Patrushev, sekretarit të Këshillit të Sigurimit të Moskës.
Në një konferencë të mëparshme, ministria e jashtme e Moskës tha se Ëang do të takohej me homologun e tij rus, Sergei Lavrov dhe të dy planifikonin të “përqendroheshin në përpjekjet për të forcuar bashkëpunimin në skenën ndërkombëtare”.
“Do të ketë një diskutim të detajuar të pikëpamjeve për çështjet që lidhen me një zgjidhje në Ukrainë, si dhe mënyrat për të garantuar stabilitetin dhe sigurinë në rajonin Azi-Paqësor,” tha një zëdhënës.
Kontakti i nivelit të lartë duket se do të rritet, me një ndihmës të Vladimir Putin që tha në korrik se presidenti rus po planifikonte të vizitonte Kinën në tetor.
