Ministri i Jashtëm i Turqisë, Hakan Fidan ka deklaruar se armëpushimi në Gazë mund të shpallet që sonte nëse Izraeli dhe Hamasi arrijnë një marrëveshje gjatë mbrëmjes.
“Nëse sot arrihet konsensusi, armëpushimi do të ndërmjetësohet. Palët treguan vullnet të madh për lirimin e të burgosurve dhe pengjeve,” ka theksuar ai gjatë një deklarate krah ministrit të Jashtëm të Sirisë.
Fidan tha se bisedimet po përqendrohen në katër prioritete, ku “është arritur shumë përparim deri tani”: lirimi i pengjeve izraelite dhe i të burgosurve palestinezë, linjat e tërheqjes së Forcave të Mbrojtjes të Izraelit (IDF), ndihma humanitare dhe kushtet e një armëpushimi të mundshëm.
Ndërkaq, presidenti i SHBA-së, Donald Trump, deklaroi ditën e djshme se Shtetet e Bashkuara janë në negociata për të përfunduar luftën në Gazë dhe për të sjellë një paqe më të gjerë në Lindjen e Mesme, duke theksuar mundësinë e një marrëveshjeje të shpejtë.
Këto komente erdhën gjatë një konference shtypi në zyrën Ovale, ku Trump priste kyeministrin kanadez Mark Carney, në një takim që synon të trajtojë tensionet tregtare mes dy vendeve, por që u kthye në një platformë për diplomacinë globale.
Duke folur për planin e tij të propozuar në shtator për Gazën – një iniciativë 20-pikëshe që parashikon lirimin e pengjeve izraelitë, tërheqjen izraelite nga pjesë të Gazës dhe transformimin e zonës në një “territor pa terror dhe i deradikalizuar” – Trump tha se “ka një mundësi që të kemi paqe në Lindjen e Mesme, diçka edhe përtej situatës në Gazë. Ne duam lirimin e menjëhershëm të pengjeve, etj.”
Ai shtoi se “ekipi ynë është atje tani. Një ekip tjetër sapo u nis, dhe pothuajse çdo vend tjetër në botë ka mbështetur planin”. “Ka një shans të vërtetë që të bëjmë diçka”, nënvizoi ai.
Trump përsëriti se “jemi shumë afër një marrëveshjeje për Lindjen e Mesme që do të sjellë paqe në të gjithë rajonin”.