Ministri i Mbrojtjes, Ejup Maqedonci, ka deklaruar se Ushtria e Kosovës është e krahasueshme me ushtritë e vendeve të Ballkanit dhe madje i tejkalon disa prej tyre.
Këtë koment ai e bëri gjatë një paneli për politikat e mbrojtjes dhe sigurisë, organizuar nga Këshilli i Përgjithshëm i Lëvizjes Vetëvendosje.
“Ushtria jonë është e krahasueshme me vendet e Ballkanit dhe i tejkalon shumë prej tyre,” tha Maqedonci, duke theksuar përparësitë që Kosova ka arritur në fushën e mbrojtjes.
Maqedonci gjithashtu përmendi përparimet në modernizimin e ushtrisë, përfshirë blerjet e sistemeve Bayraktar dhe Javelin, si dhe prokurimin e disa sistemeve të tjera që pritet të fuqizojnë kapacitetet luftarake të Kosovës.
“Investimet në armatim kanë shënuar rritje prej 6,000 për qind. Në periudhën 2018-2020 janë shpenzuar më pak se katër milionë euro për armatim, ndërsa nga 2021 deri në 2023 janë shpenzuar 238 milionë euro. Këto blerje kanë kursyer miliona euro nga buxheti i Kosovës,” theksoi ministri.
Ai vuri në dukje se Kosova është në proces të ekzekutimit të pagesave për sistemet strategjike Bayraktar dhe Javelin, dhe se këto investime janë pjesë e një përpjekjeje më të gjerë për të rritur kapacitetet mbrojtëse të vendit.
