Ministria e Jashtme dhe Diasporës në Kosovë u ka bërë thirrje shtetasve të saj që të shmangin udhëtimet nëpërmjet territorit të Serbisë. Ky reagim vjen pas arrestimit të shtetasit shqiptar nga Kosova pas hyrjes në territorin serb.
Ministria e Jashtme e Kosovës i ka bërë thirrje ndërkombëtarëve që të reagojnë ndaj atyre që i cilësojnë si praktika represive të autoriteteve serbe që sipas ministrisë bien ndesh me parimet themelore të së drejtës ndërkombëtare.
“Ministria e Punëve të Jashtme dhe Diasporës u bën thirrje të gjithë qytetarëve të Republikës së Kosovës që të shmangin udhëtimet nëpërmjet territorit të Serbisë, me qëllim të garantimit të sigurisë dhe mirëqenies së tyre. MPJD gjithashtu nënvizon nevojën urgjente për reagim nga ana e Bashkësisë Ndërkombëtare ndaj praktikave represive të autoriteteve serbe, të cilat bien ndesh me parimet themelore të së drejtës ndërkombëtare dhe me konventat ndërkombëtare për të drejtat e njeriut”, thuhet në njoftimin e ministrisë.
Një ditë më parë shtetasi shqiptar nga Kosova Hazir Haziri u arrestua nga autoritetet serbe në pikën kufitare në Merdarë pas hyrjes në territorin serb.
Ministria e Jashtme e Kosovës bën me dije se ka vënë në dijeni të ngjarjes edhe Delegacionin e BE-së në Serbi, përfshi edhe përfaqësuesit diplomatik të vendeve të QUINT-it.
“Zyra Ndërlidhëse e Republikës së Kosovës ka adresuar një kërkesë zyrtare autoriteteve të Qeverisë së Serbisë për të konfirmuar arrestimin e z. Haziri dhe për të sqaruar arsyet ligjore të ndalimit të tij. Nëse ndaj z. Haziri vendoset masa e paraburgimit dhe iniciohet procedurë penale, Zyra Ndërlidhëse e Republikës së Kosovës në Serbi do të bëj kërkesën për vizitë zyrtare në qendrën e ndalimit”, thuhet në njoftimin e MPJD-së.
