“Mielli nuk është problem”, thotë MEPTINIS.

Ministria e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike (MEPTINIS) thotë se është duke marrë të gjithë hapat e nevojshëm për të siguruar furnizimin e rregullt të tregut me drithë dhe miell.

Në mbështetje të Republikës së Kosovës dhe vendeve të rajonit Këshilli për Bashkëpunim Rajonal, i përkrahur nga Bashkimi Evropian, thotë se ka marrë nismë për hapjen e korridoreve të gjelbra duke synuar mundësinë e qarkullimit të lirë të mallrave të domosdoshme.

“Në takimin e sotëm rajonal përmes një video konference me zyrtarët e Ministrisë, Këshilli për Bashkëpunim Rajonal ka kumtuar zotimet për krijimin e korridoreve të gjelbra që mundësojnë qarkullimin e lirë të mallrave të domosdoshme — duke përfshirë grurin dhe miellin”, thuhet në njoftim.

Sipas MEPTINIS, në këtë takim janë diskutuar propozimet nga Sekretariati i Përhershëm i Komunitetit të Transportit dhe Sekretariati i CEFTA për të vendosur korridore të gjelbra brenda territorit të Ballkanit Perëndimor.

“MEPTINIS po vijon bashkëpunimin dhe komunikimin e afërt me akterët përkatës në tregun vendor dhe rajonal dhe me mekanizmat shtetërorë për të siguruar bukën për qytetarët gjatë periudhës së pandemisë. MEPTINIS rikujton se blerjet masive të shtytura nga paniku janë të panevojshme. Institucionet e Republikës së Kosovës kanë mjetet financiare dhe burimet e duhura për të siguruar furnizimin me mallrat esencialë. Situata bën thirrje për kujdes dhe maturi, pa panik”, përfundon njoftimi.